1Pe 3 | MHL | STEP | Aria sira naapiw, ni emeria niena mua tepak-pa wiar ikok opora wia miimeka. Ne ni emeria papako, makena niena mua Yeesus opora me wiar opimik, nain ni sira eliwa-pa ikaiwkin naap nia urufap kema kirikuan-yon. Nis-ke me wia maakowen. Moram ni sira eliwa ne Mua Maneka opora baliwep ookiman nain wieniw niar urufap kema kirep opora wiar opikuan.

1 Peter 3

Wi mua emeria wiam saliwami baliwep ikowa opora

1 Aria sira naapiw, ni emeria niena mua tepak-pa wiar ikok opora wia miimeka. Ne ni emeria papako, makena niena mua Yeesus opora me wiar opimik, nain ni sira eliwa-pa ikaiwkin naap nia urufap kema kirikuan-yon. Nis-ke me wia maakowen. Moram ni sira eliwa ne Mua Maneka opora baliwep ookiman nain wieniw niar urufap kema kirep opora wiar opikuan. 3 Maa bala opowa, afifa sira-sira purekowa, wapen purowa sira-sira wuowa ne mia suuwowa ele-eliwa wuowa nain me niena maa bala akena-ke. 4 Ni bala opowa nain me mia maa-ke, weetak, niena kema baliwep ne kekelka ikowa nain makena, nain niena maa bala eena me geenarowa, anane ikaiya nain-ke. Sira nain sira eliwa-ke, eena Mua Maneka kookaliya nain. 5 Nain eliwa-ke, moram iiriw wi emeria eliwa eena Mua Maneka opora wiar ookamik nain wiena mua opora wiar miimam-ikemik. Sira nain yiena maa bala-ke naem-ikemik. 6 Sara naap onam-ikua, ona mua Abraham “Yena saria” naemi opora wiar miimam-ikua. Aria ni maa oko-ko me keker opami sira wiar ookam-ikowen-na o kaka-ke nia naikuan.

7 Ne ni mua, niena emeria baliwep wia wueka. Wi kekanowa marew naep wia asipami wia saliwam-ikeka. Moram anane eliwa ikowa eena Mua Maneka-ke nia maek nain muaiya emeria makena urufowa-ke. Ni emeria baliwep wia wuam-ikowen-na ni Mua Maneka farep maa nokarowa nain nia apekarinon, maa mauwa-ke era puukinon, weetak.

Mua oko wia saliwowiw ikowa

8 Aria yo opor kapa silewami feenap maiyem, ni unowiya kema kuisow ikeka, ne niam kemaleka. Mua Maneka teeria-pa wiar ikok aamun paapa niam naemi niam kookaleka, ne wi samorarep ikemik nain wia kemalep wia asipeka, ne niena unuma niam poreka. 9 Mua oko-ke pina nefa oneya-na muuna me urure, ne nefa firekeya-na naapiw me kiripe. Opor samora-pa amukarowa epak nain nos-ke opor eliwa maakemi no eliwa ike nae. Moram kema eliwa ikowa nain Mua Maneka ona niowa maek, naapeya wia saliweka nia naep nia farek. 10 Eena Mua Maneka opora maek, feenap,

“O mua kema eliwiw ikainen ne pokow eliwa-pa ikainen naep-na opor samora ne wadol opora me aakuninok.
11 Sira samora piipuap sira eliwa-pa ikainok. Ne pun mua oko sira eliwa wia ofakowami wiamiya kema kuisow ikowa nain ookinok.
12 Moram yiena Maneka wi mua eliwa nain wia urufam-ikaiya, ne o farimik nain ifana wuami wia apekariya. Ne wi sira samora onimik nain mikikira wiiya.”
(Someka 34.12-16)

Sira eliwiw ikowa

13 Ni sira eliwa onowa topialowen-na naareke nia samorinon? 14 Ne ni sira kakeniw oniman, nain nia samoruk-na ni eliw kemelowen. Ne nia keker opowiwkin-na me keker opaka, ne mia me fufueka. 15 Krais yiena Maneka-ke naep opora wiar miimeka. Ne ni Krais ookiman nain kema suuwam-ikeka. Naeya ona opora kemaiw ikeman nain nia nokariwkin-na wia maakep-puowen. Nain ni momasia ikok sira eliwa-pa wia ookomaka. Ne sira samora me oneka, naeya ni niam pupep niam urufap eliw maowen, i kakeniw ikemik. Naeya ni sira eliwa nain, wi mua eena murarow opora nia onimik nain naap nia urufap wieniw emina ururikuan. 17 Mua Maneka kookalowa wiar ookowa-pa sirirowa aawowa-ke eliw. Ne sira samora oniwkin sirirowa niimik nain weetak.

Krais i pina muuta nain umok

18 Ni Krais kema suuweka, o nia aawep Mua Maneka mamaiya-pa nia wuowa naep ni pina muuta nain umok. O pina marew, dubil akena ikua, nain i pina mua umowa nain os-ke umok. Ne umowa kuisow muuta aremi pina niar weeser-wuak. O mia onaiyik umok, ne umep ikaeya Mua Maneka-ke ewar kekanowa iwok. 19 Ne ikiwep wi mua iiriw umemik nain kukusa, Mua Maneka opora wia maakek. 20 Wi iiriw ekera eena Noa ikowa-pa Mua Maneka opora wiar fienam-ikemik, wi nain. Nain o ewur me wia samorak, Noa aasa onam-ikaeya arewak. Ne Noa teeria wiam ikur okaiwi-pa arow naap aasa-pa ikaiwkin eka maneka miiwa muok. Ne teeria gelemuta nain muutiw aasa-pa me samor aawemik, eka iinan-pa wueliw ikemik. 21 Nain ookami aakisa eka-pa nia yasuwowa maimik. Me mia tumina iirarowa naep nia yasuwimik, weetak. Nia yasuwimik nain ni Mua Maneka mokoka-pa i pina piipuiyen naiman. Naap maiman nain Yeesus Krais iikirak nain-ke makena arowak. 22 O eena owow iinan urupep Mua Maneka aken ekeria-pa wiar pokap ikaeya wi ensel, wi aaperek inasina ne wi ewar kekanowa onaiya ikomakemik nain, wi unowiya tepak-pa wiar ikok osiw miimam-ikaimik.